E nomber Aruba probablemente ta bin di e idioma Arawak cu ya no ta existi mas. E prome biaha cu e palabra Aruba ta aparece, ta den un documento cu ta data for di aña 1526. Nunca por a determina si e nomber di e isla ta danki na su habitantenan of ta net contrario.

E prome habitantenan di Aruba tabata e Indjannan Caquetio di e tribo Arawak. Na aña 1499 e prome Europeonan cu a yega riba e beachnan di Aruba ta e descubrido Spaño Alonso de Ojeda. Rond di aña 1515, Spañonan a deporta e Indjannan di Aruba pa Hispañola (Republica Dominicano), unda nan mester a traha como esclavo den e mina di koper y plantacion. Di tera firme otro Indjannan a bin establece na Aruba. Na aña 1526 Juan d'Ampues, un mandatario Spaño, lo a cuminsa rehabita Aruba atrobe.

E fiesta cultural di San Juan (Juan Bautista), miho conoci como Dera Gay ta data for di 1862 y nos ta celebr'e tur aña tur afo dia 24 di juni. Tin diferente version tocante e origen di e fiesta religioso y cultural aki cu Aruba ta celebra como un fiesta nacional. E origen religioso ta referi na e nacemento di Juan Bautista y e origin cultural ta referi na e fiesta di cosecha.

Como fiesta cultural, dia di San Juan ta mas conoci pa su musica, baile, cendemento di candela, cuminda tipico y bebida. E colornan cu ta domina den e celebracion ta cora y geel. E colo geel ta pa e mata di kibrahacha cu ta floria durante luna di juni. Cora ta e colo di candela. Segun e tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela p'asina cuminsa prepara pa e temporada nobo di cosecha. E cendemento di candela ta e simbolo di purificacion.

Dia 24 di juni, despues di bahada di solo, e fiesta di San Juan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. Tambe tin e baile di bandera, diferente banderin ta wordo poni riba vloer y e bailado cu su wowo bon mara mester piki e banderinnan. E baile mas conoci t'esun di Dera Gay, unda e hende homber cu su wowo mara y c'un palo den su man mester purba mata e gay.

Antes e bailamento ta tuma luga den sabana y ta dera un gay bibo pa e baile aki. Awendia ta uza sea un gay traha y e baile ta den club. Esunnan cu ta baila ainda den sabana of riba veld di tera ta uza un calbas. Henter e baile ta tuma luga bou tocamento y cantamento di e cantica di San Juan. E cantica ta conoci for di 1862. Ta acompaña e baile cu canto y musica folklorico. E instrumentonan musical mas uza ta fio, wiri, raspa y tambu. Cuminda y bebida na abundancia tambe ta parti di e fiesta.

E fiesta di San Juan y Dera Gay a bira hopi popular atrobe despues di añanan setenta y awendia Departamento di Cultura ta bishita e scolnan pa duna informacion y demostracion di e fiesta y e baile. Gobierno y organisacionnan cultural ta prepara pa celebra e fiesta cultural aki dia 24 di juni.